नवलपुर, भदौ ७ । गैँडाकोटमा पूर्वशिक्षकबाट विद्यार्थीमाथि भएको अमर्यादित घटनालाई लिएर सरस्वती निकेतन आवासीय माध्यमिक विद्यालयले गम्भीर ध्यानाकर्षण भएको जनाएको छ।
विद्यालयका प्राचार्य भरतबाबु कँडेलद्वारा जारी प्रेस विज्ञप्तिमा घटनामा संलग्न भनिएका शिक्षकलाई विद्यालयबाट तत्काल निष्कासन गरिसकिएको उल्लेख छ। विद्यालयले घटनामा संस्थाको कुनै संलग्नता नरहेकोसमेत स्पष्ट पारेको छ।
विज्ञप्तिअनुसार घटना विद्यालय परिसर वा विद्यालयको नियमित समयमा नभई सम्बन्धित शिक्षकको निजी समयमा विद्यार्थीको निवासमा होम ट्युसन पढाउने क्रममा भएको हो। घटनाबारे जानकारी प्राप्त भएपछि विद्यालय व्यवस्थापन समिति तथा अभिभावकहरूसँग छलफल गरी सम्बन्धित शिक्षकलाई तत्काल प्रभावबाट सेवाबाट बर्खास्त गरिएको विद्यालयले जनाएको छ।
विद्यालयले कुनै व्यक्तिको व्यक्तिगत आचरण तथा कसुरलाई संस्थासँग जोडेर विद्यालयको प्रतिष्ठामा आँच पुग्ने गरी भ्रामक समाचार सम्प्रेषण नगर्न सञ्चारमाध्यम, अभिभावक तथा शुभचिन्तकहरूलाई आग्रह गरेको छ।
साथै, घटनाको सत्यतथ्य छानबिन गरी पीडितलाई न्याय दिलाउने कार्यमा प्रहरी–प्रशासनबाट भइरहेको कानुनी अनुसन्धानमा विद्यालयको पूर्ण सहयोग र प्रतिबद्धता रहने विज्ञप्तिमा उल्लेख छ।
विद्यालयले सुरक्षित, मर्यादित र अनुशासित शैक्षिक वातावरण कायम राख्न आफू प्रतिबद्ध रहेको जनाउँदै हाल विद्यालयको शैक्षिक तथा प्रशासनिक गतिविधि नियमित र शान्तिपूर्ण रूपमा सञ्चालन भइरहेको स्पष्ट पारेको छ।
विद्यालयले घटनासँग सम्बन्धित विषयमा तथ्य र प्रमाणका आधारमा निष्कर्षमा पुग्न तथा अनुसन्धान प्रक्रियालाई सहयोग गर्न सबै पक्षसँग आग्रहसमेत गरेको छ।
सम्बन्धित खवर
